Қазақстан Республикасы Президентінің «Әкімдердің халықпен кездесулерін өткізу туралы» Жарлығына сәйкес Мақтаарал ауданында жергілікті атқарушы органдардың халық алдындағы ашықтығы мен есептілігін арттыру, елде жүзеге асырылып жатқан реформалар туралы тұрғындарды кеңінен ақпараттандыру бағытындағы жұмыстар жалғасуда. Осы мақсатта Мақтаарал ауданының әкімі Бақыт Асанов Атакент кентінің тұрғындарымен көшпелі кездесу өткізді.
Кездесудің негізгі мақсаты – Мемлекет басшысының бастамалары мен мемлекеттік саясаттың негізгі бағыттарын халыққа түсіндіру, елімізде жүзеге асырылып жатқан саяси және әлеуметтік-экономикалық өзгерістер туралы ақпарат беру, сондай-ақ жергілікті атқарушы органдар мен тұрғындар арасында тұрақты әрі ашық диалог қалыптастыру.
Жиын барысында Мақтаарал ауданында 2026 жылдың алғашқы алты айында атқарылған жұмыстар туралы арнайы бейнеролик көрсетілді. Тұрғындарға ауданның әлеуметтік-экономикалық даму барысы, жүзеге асырылып жатқан жұмыстар мен алдағы міндеттер жөнінде ақпарат берілді.
Сонымен қатар аудан әкімі Мемлекет басшысы Қасым-Жомарт Тоқаевтың бастамасымен елімізде жүзеге асырылып жатқан саяси және әлеуметтік-экономикалық өзгерістерге тоқталып, олардың маңызын түсіндірді. Елдегі өзгерістердің жергілікті басқару жүйесіне жүктейтін міндеттері де назардан тыс қалмады.
Бақыт Асанов мемлекеттік басқару жүйесіндегі жаңарулар жергілікті атқарушы органдарға да үлкен жауапкершілік жүктейтінін атап өтті. Мемлекеттік саясатты аудан тұрғындарының игілігіне тиімді бағыттау, заңдылықты сақтау, қоғамдық тәртіпті қамтамасыз ету, халықтың әл-ауқатын арттыру және ауданның әлеуметтік-экономикалық дамуын одан әрі жетілдіру негізгі міндеттердің қатарында екені айтылды.
Кездесу барысында «Заң мен тәртіп» қағидатына да ерекше назар аударылды. Заң талаптарын сақтау, қоғамдық тәртіпті қамтамасыз ету және азаматтардың құқықтары мен заңды мүдделерін қорғау мемлекеттік және жергілікті басқару органдарының маңызды міндеттерінің бірі ретінде қарастырылды.
Аудан басшысы мемлекеттік деңгейде қабылданған шешімдер мен қолға алынған реформалардың нақты нәтижесі жергілікті жерлердегі жұмыстармен тікелей байланысты екенін атап өтті. Осыған байланысты тұрғындардың мәселелерін тыңдау, олардың ұсыныстарын ескеру және шешімін қажет ететін мәселелерді тиісті мемлекеттік органдардың қатысуымен қарастыруға басымдық берілуде.
Кездесуде Атакент кентінің әлеуметтік мәселелері де кеңінен талқыланды. Тұрғындарды алаңдатып отырған өзекті мәселелер көтеріліп, аудан басшысы оларды шешу бағытында атқарылып жатқан жұмыстар мен алдағы жоспарлар туралы ақпарат берді.
Жиынның маңызды бөлігі тұрғындармен тікелей пікір алмасуға арналды. Халыққа ашық микрофон ұсынылып, Атакент кентінің тұрғындары өздерін толғандырған мәселелерді аудан басшысына тікелей жеткізді. Азаматтар түрлі сауалдарын қойып, кенттің дамуына қатысты ұсыныс-пікірлерін ортаға салды.
Бақыт Асанов әрбір тұрғынның сұрағын тыңдап, көтерілген мәселелер бойынша тиісті жауаптар берді. Тұрғындардың өтініштері мен ұсыныстары назарға алынып, қосымша қарауды қажет ететін мәселелерді тиісті сала мамандарының қатысуымен зерделеу қажеттігі айтылды.
Әкімдердің халықпен тұрақты кездесулер өткізуі – мемлекеттік басқарудың ашықтығы мен есептілігін қамтамасыз етудің маңызды тетіктерінің бірі. Бұл формат арқылы тұрғындар жергілікті атқарушы органдардың қызметі туралы тікелей ақпарат алып, өздерін толғандырған мәселелерді аудан басшылығына жеткізуге мүмкіндік алады.
Сонымен бірге халықпен ашық кездесулер елде жүргізіліп жатқан реформалар мен Мемлекет басшысының бастамаларын түсіндіруге мүмкіндік береді. Мемлекеттік деңгейде қабылданып жатқан шешімдердің мәнін халыққа жеткізу және олардың жергілікті жерлерде жүзеге асырылу барысы туралы ақпарат беру мемлекеттік органдар мен қоғам арасындағы байланысты нығайтады.
Атакент кентінде өткен кездесу де Мемлекет басшысының Жарлығын орындау, мемлекеттік саясат пен реформаларды ақпараттық сүйемелдеу, жергілікті атқарушы органдардың қызметі туралы халықты хабардар ету және тұрғындармен кері байланысты күшейту бағытындағы жүйелі жұмыстардың жалғасы болды.
Мақтаарал ауданында тұрғындармен ашық диалог орнату, халықтың ұсыныс-пікірлерін тыңдау және мемлекеттік саясаттың негізгі бағыттарын түсіндіру жұмыстары алдағы уақытта да жүйелі түрде жалғасын табады.
