Кентау қаласында шағын және орта бизнесті дамыту, жергілікті өндірісті қолдау және жаңа жұмыс орындарын ашу бағытындағы жұмыстар жалғасып келеді. Кәсіпкерлікті дамытуға арналған мемлекеттік бағдарламалар өндірістік жобаларды жүзеге асыруға, қажетті құрал-жабдықтарды жаңартуға және кәсіп иелерінің өндірістік мүмкіндіктерін кеңейтуіне жол ашып отыр. Соның бірі, «Ауыл аманаты» бағдарламасы аясында кәсібін ұлғайтып, жаңа өндірістік цех ашқан жергілікті кәсіпкер Ратмир Аширбаевтың жобасы.
Ратмир Маратұлы өндірістік бағыттағы шағын кәсіпті 2010 жылдан бері жүргізіп келеді. Бірнеше жыл бойы жинақтаған тәжірибесін өндіріс көлемін арттыруға пайдаланып, кәсібін жаңа деңгейге көтеруді мақсат еткен кәсіпкер «Ауыл аманаты» бағдарламасының мүмкіндігін тиімді пайдаланған. Бағдарлама аясында 2,5 пайыздық жеңілдетілген несие алып, өндірістің қажеттіліктеріне сай заманауи техникалар мен арнайы жабдықтар сатып алған.
Кәсіпкердің айтуынша, өндірістік бағыттағы бизнесті дамыту үшін ең алдымен материалдық-техникалық базаны күшейту қажет. Жаңа жабдықтардың алынуы жұмыс көлемін арттырып қана қоймай, әртүрлі тапсырыстарды орындауға мүмкіндік берген. Осылайша шағын кәсіпорынның өндірістік әлеуеті кеңейіп, жергілікті жерде қажетті бөлшектерді дайындау мүмкіндігі артқан.
Кәсіпкерге Кентау қаласының индустриялық аймағынан 1,5 гектар жер телімінің бөлінуі де өндірісті кеңейтуге жағдай жасаған. Осы аумақта көптен бері жоспарланған өндірістік цех іске қосылды. Бүгінде кәсіпорында 7 адам тұрақты жұмыспен қамтылған. Өндірістің ұлғаюына байланысты алдағы уақытта жұмыс орындарының санын көбейту де жоспарланып отыр.
Өндірістік цехта металды өңдеудің бірнеше түрі жүзеге асырылады. Атап айтқанда, токарлық, фрезерлік, тіс кесу, шынықтыру, бұрғылау және координаттық өңдеу жұмыстары жүргізіледі. Мұнда қара металды бастапқы өңдеуден өткізіп, қажетті бөлшектерді дайын өнімге дейін жеткізуге мүмкіндік бар.
Мұндай өндірістің Кентау үшін өзіндік маңызы бар. Қажетті бөлшектерді жергілікті жерде дайындау кәсіпорындардың сырттан жеткізілетін өнімге тәуелділігін азайтуға ықпал етеді. Сонымен қатар өндірістік қызметтің дамуы шағын кәсіпкерліктің аясын кеңейтіп, қаладағы техникалық мамандықтарға сұраныстың артуына да негіз болады.
Кәсіпорынның тапсырыс берушілері тек Кентау қаласымен шектелмейді. Бүгінде өндірістік цехқа Түркістан және Қызылорда облыстарынан да тапсырыстар түсіп келеді. Бұл жергілікті кәсіпкердің өндірістік мүмкіндіктерінің кеңейіп, шығарылатын өнімдер мен орындалатын жұмыстарға сұраныстың бар екенін көрсетеді.
Өндірістің дамуы өңірдегі кәсіпкерлік белсенділікпен қатар, жергілікті экономиканың нығаюына да әсер етеді. Шағын өндіріс орындарының көбеюі жаңа жұмыс орындарын ашуға, мамандардың еңбекпен қамтылуына және өңірде тауарлар мен өндірістік бөлшектерді дайындау көлемін арттыруға мүмкіндік береді. Әсіресе өндірістік бағыттағы жобалардың жүзеге асуы қаланың индустриялық әлеуетін күшейтуге ықпал етеді.
Кәсіпкердің алдағы жоспары да өндірісті одан әрі дамытуға бағытталған. Ратмир Аширбаев өндірістік цехтың жұмысын кезең-кезеңімен кеңейтіп, ауыл шаруашылығына қажетті техника мен қосалқы бөлшектер шығаруды қолға алуды жоспарлап отыр. Бұл бағытта өндірістік қуаттылықты арттыру, жаңа құрал-жабдықтармен толықтыру және жұмыс көлемін ұлғайту көзделген.
Жаңа өнім түрлерін шығару кәсіпорынның тапсырыс аясын кеңейтуге мүмкіндік береді. Әсіресе ауыл шаруашылығы техникасына қажетті қосалқы бөлшектерді жергілікті жерде дайындау өндірістің жаңа бағытын қалыптастыруға негіз болмақ. Кәсіпкер бұл мақсаттарды біртіндеп жүзеге асырып, өндіріс көлемін арттырумен қатар жаңа жұмыс орындарын ашуды көздеп отыр.
«Ауыл аманаты» бағдарламасы арқылы қолдау алып, өндірістік базасын қалыптастырған кәсіпкердің жобасы шағын кәсіпкерліктің өндіріс салындағы мүмкіндіктерін көрсетеді. Кәсіпкерлік бастаманың нақты өндіріске ұласуы, техникалық жабдықтардың жаңартылуы және өндірістік цехтың іске қосылуы Кентау қаласының индустриялық бағытын дамытуға өз үлесін қосып отыр.
Алдағы уақытта кәсіпорынның өндірістік қуатын арттыру, өнім түрлерін көбейту және тапсырыс көлемін ұлғайту жоспарлануда. Бұл өз кезегінде Кентаудағы өңдеу өндірісінің дамуына, жергілікті өнім көлемінің артуына және жаңа жұмыс орындарының қалыптасуына ықпал ететін жобалардың бірі болмақ.
