Кентау қаласының әкімі Жандос Тасов қалаға инвестиция тарту, өндірістік жобаларды дамыту және жаңа экономикалық мүмкіндіктерді қарастыру мақсатында инвесторлармен кездесу өткізді. Кездесуде қаланың инвестициялық әлеуеті таныстырылып, кәсіпкерлік бастамаларды жүзеге асыруға қолайлы жағдайлар жасау мәселелері талқыланды.
Келіссөзге Қытай Халық Республикасындағы түсті металдарды балқыту кезінде пайда болатын өндірістік қалдықтарды кешенді қайта өңдеу және олардан бағалы металдарды алу бағытында жұмыс істейтін «Цзинъюань Гаонэн» компаниясының өкілдері қатысты.
Өндірістік қалдықтарды қайта өңдеу мүмкіндіктері талқыланды
Кездесу барысында тараптар Кентау қаласында бірлескен инвестициялық жобаларды жүзеге асыру мүмкіндіктерін қарастырды. Әсіресе өндірістік қалдықтарды қайта өңдеу, олардың құрамындағы бағалы металдарды алу және осы бағыттағы жаңа технологияларды қолдану мәселелеріне назар аударылды.
Сонымен қатар өзара тиімді ынтымақтастық орнату, инвестициялық бастамаларды іске асырудың мүмкіндіктерін зерделеу және алдағы бірлескен жұмыстың бағыттарын айқындау жөнінде пікір алмасты.
Мұндай жобаларды қарастыру өндірістік ресурстарды тиімді пайдалануға, қалдықтарды қайта өңдеу саласын дамытуға және өндірістік әлеуетті кеңейтуге мүмкіндік береді.
Инвестиция – қала экономикасын дамытудың маңызды бағыты
Қала әкімі Жандос Тасов инвестициялық жобалардың Кентау экономикасын дамытудағы маңызын атап өтті. Оның айтуынша, жаңа жобаларды іске асыру өндіріс көлемін арттыруға, қосымша жұмыс орындарын ашуға және қаланың экономикалық әлеуетін нығайтуға ықпал етеді.
Кездесу қорытындысы бойынша тараптар келісілген екіжақты ынтымақтастық аясында инвестициялық жобаларды іске асыру мүмкіндіктерін қарастыру жұмыстарын жалғастыруға келісті.
Алдағы уақытта аталған бағыттағы келіссөздер мен өзара іс-қимыл жұмыстары жалғасып, жобаларды жүзеге асырудың нақты мүмкіндіктері зерделенетін болады.
Кентау қаласы әкімдігінің баспасөз қызметі
