8 қазан күні Кентау политехникалық колледжінде студенттердің бойында ұлттық рухты, отансүйгіштік сезімді және адамгершілік қасиеттерді қалыптастыруға бағытталған тағылымды кездесу өтті. Іс-шараның негізгі мақсаты – жас ұрпаққа ұлттық құндылықтардың мәнін түсіндіру, олардың ел тарихына, ана тіліне, салт-дәстүріне деген құрметін арттыру және қоғам алдындағы жауапкершілігін сезіндіру.
Ұлттық құндылықтар – халықтың ғасырлар бойы қалыптасқан рухани мұрасы, дүниетанымы мен өмір салтын айқындайтын маңызды ұстанымдар жиынтығы. Оларды сақтау және кейінгі ұрпаққа жеткізу қоғамның рухани сабақтастығын қамтамасыз етеді. Әсіресе білім алып, болашақ мамандығына қадам басып жатқан жастар үшін ұлттық тәрбие мен азаматтық жауапкершіліктің маңызы зор.
КЕЗДЕСУГЕ АРНАЙЫ МАМАНДАР ҚАТЫСТЫ
Тағылымды шараға «Кентау қалалық Руханият орталығы» КММ-нің ұлттық құндылықтарды насихаттау маманы Т. Сүлейменов, Түркістан облысы Қоғамдық даму басқармасының «Қоғамдық келісім» КММ Кентау қалалық филиалының басшысы Б. Әшірбаев және «Жастар ресурстық орталығы» КММ-нің заңгері Б. Шакиров қатысты.
Кездесу барысында мамандар студенттермен ұлттық тәрбие, қоғамдық келісім, жастардың құқықтық сауаттылығы және рухани даму мәселелері бойынша ой бөлісті. Мұндай кездесулер жастардың қоғамдағы өз орнын түсінуіне, азаматтық ұстанымын қалыптастыруына және өзекті мәселелерге жауапкершілікпен қарауына ықпал етеді.
Сонымен қатар жас буынның ұлттық мұраны танып-білуі, ата-баба дәстүрлерін құрметтеуі және туған жердің тарихына қызығушылық танытуы қажеттігі атап өтілді. Ұлттық құндылықтарды дәріптеу тек өткенді танумен шектелмей, оны қазіргі өмірмен байланыстырып, күнделікті іс-әрекетте ұстануға да негізделеді.
АНА ТІЛІ МЕН САЛТ-ДӘСТҮРГЕ ҚҰРМЕТ
Шара барысында ана тілін құрметтеу, ұлттық салт-дәстүрді сақтау, отбасылық тәрбиенің рөлі және ел тарихын білу мәселелеріне ерекше назар аударылды. Ана тілі – халықтың рухани болмысы мен мәдениетін жеткізетін басты құрал. Ал салт-дәстүр ұрпақтар арасындағы байланысты нығайтып, ұлттық ерекшелікті сақтауға мүмкіндік береді.
Отбасындағы тәрбие де жас адамның тұлға болып қалыптасуында маңызды орын алады. Үлкенге құрмет көрсету, кішіге ізет білдіру, жауапкершілік таныту, адал еңбек ету және айналасындағы адамдарға қамқор болу сияқты қасиеттер ұлттық тәрбиенің ажырамас бөлігі саналады.
