Мақтаарал ауданында мемлекеттік қызметтердің сапасы мен қолжетімділігін бағалау мақсатында қоғамдық бақылау жұмыстары жүргізілді. Қазақстан Республикасы Мемлекеттік қызмет істері агенттігінің Түркістан облысы бойынша департаментінің бастамасымен ұйымдастырылған шараның негізгі мақсаты – халыққа көрсетілетін қызметтердің сапасын арттыру және мүмкіндігі шектеулі азаматтарға қолайлы жағдай жасау.
МЕМЛЕКЕТТІК ҚЫЗМЕТ КӨРСЕТУ ОРЫНДАРЫ ТЕКСЕРІЛДІ
Кезекті қоғамдық бақылау Мырзакент кентіндегі С. Рахымов атындағы мектепте және Жаңажол ауылдық округі әкімі аппаратының мемлекеттік қызмет көрсету орындарында өткізілді.
Мониторинг жұмыстарына аудан әкімі аппаратының ақпараттандыру, мемлекеттік қызмет көрсету мониторингі және терроризмге қарсы іс-қимыл жөніндегі бөлімінің инспекторы Асылхан Баратбек қатысты. Бақылау барысында мекемелердегі қызмет көрсету тәртібі мен азаматтарға жасалған жағдайлар зерделенді.
ҚОЛЖЕТІМДІ ОРТА ҚАЛЫПТАСТЫРУҒА НАЗАР АУДАРЫЛДЫ
Қоғамдық бақылау кезінде мемлекеттік қызметтердің қолжетімділігіне, ғимараттардың кіреберісі мен ішкі жағдайына, сондай-ақ мүмкіндігі шектеулі азаматтардың кедергісіз қызмет алуына ерекше мән берілді.
Сонымен қатар қызмет көрсету орындарының белгіленген талаптарға сәйкестігі, азаматтардың өтініштерін қабылдау тәртібі және мемлекеттік қызметтердің қағидалары мен стандарттары туралы ақпараттың орналастырылуы тексерілді. Өтініштерді толтыру үлгілерінің көрнекі әрі азаматтарға қолайлы жерде тұруы да назардан тыс қалмады.
ҚЫЗМЕТ КӨРСЕТУ ҮДЕРІСІНІҢ САПАСЫ ЗЕРДЕЛЕНДІ
Мониторинг барысында өзіне-өзі қызмет көрсету бұрышының жай-күйі де қаралды. Азаматтардың мемлекеттік қызмет алу кезінде ұзақ уақыт кезекте тұруына жол бермеу, қызмет көрсету үдерісінің ашықтығы мен қолайлылығын қамтамасыз ету мәселелері талқыланды.
Мұндай бақылау жұмыстары мемлекеттік мекемелердегі қызмет көрсету сапасын бағалауға, азаматтардың қажетті ақпаратты кедергісіз алуына және қызмет көрсету барысында туындауы мүмкін мәселелерді анықтауға мүмкіндік береді.
АНЫҚТАЛҒАН КЕМШІЛІКТЕР БОЙЫНША ҰСЫНЫМДАР БЕРІЛДІ
Қоғамдық бақылау қорытындысы бойынша анықталған кемшіліктерді жоюға қатысты тиісті ұсынымдар беріліп, оларды қысқа мерзімде ретке келтіру ұсынылды.
Мақтаарал ауданында мемлекеттік қызметтердің сапасы мен қолжетімділігін арттыру, азаматтардың құқықтары мен заңды мүдделерін қорғау бағытындағы жұмыстар алдағы уақытта да тұрақты бақылауда болады.
Мақтаарал ауданы әкімінің баспасөз қызметі
