Түркістан облысында тұрғындардың кәсіпкерлік белсенділігін арттыру, қаржылық сауаттылығын жетілдіру және бизнес жүргізу бойынша білімін кеңейту бағытындағы жұмыстар жалғасуда. Осы мақсатта «TÚRKISTAN» Кәсіпкерлерге қызмет көрсету орталығы өңірдің аудан-қалаларында «Кәсіпкерлік негіздері және агроқұзыреттілік» тақырыбында оқыту семинарларын ұйымдастыруда.
Кезекті семинар Мақтаарал ауданында өтіп, кәсіп бастауға ниетті азаматтар мен ауыл шаруашылығы саласына қызығушылық танытқан тұрғындарға пайдалы ақпарат ұсынылды.
КӘСІПКЕРЛІКТІ ДАМЫТУДЫҢ НЕГІЗГІ БАҒЫТТАРЫ ТҮСІНДІРІЛДІ
Семинар барысында қатысушыларға кәсіп ашу және оны дамыту жолдары, бизнес-жоспар әзірлеу, қаржыландыру мүмкіндіктері мен мемлекеттік қолдау тетіктері туралы түсіндірілді. Сонымен қатар ауыл шаруашылығында тиімді әдістерді қолдану, қолда бар ресурстарды ұтымды пайдалану және агроөндіріс саласындағы тәжірибелер жөнінде мәлімет берілді.
Оқыту орталығының бизнес-тренері Жасұлан Мендикулов кәсіпкерлік негіздері мен агроқұзыреттілік бағыттары бойынша дәріс оқыды. Ол бизнес жүргізудің маңызды қырларына тоқталып, қатысушылардың сұрақтарына жауап берді.
ТЕОРИЯЛЫҚ БІЛІМ ТӘЖІРИБЕМЕН ҰШТАСТЫ
Семинардың тәжірибелік кезеңінде қатысушылар «ИП Арай» кәсіпкерлік нысанының жұмысымен танысты. Олар кәсіптің ұйымдастырылу барысын көріп, бизнесті жүргізу тәжірибесімен танысуға мүмкіндік алды.
Мұндай тәжірибелік кездесулер теориялық білімді нақты іспен ұштастырып, кәсіпкерлік қызметтің ерекшеліктерін тереңірек түсінуге көмектеседі. Сонымен қатар қатысушылар өзара тәжірибе алмасып, болашақтағы бизнес бастамаларына қажетті ақпарат жинақтай алады.
Оқыту қорытындысы бойынша қатысушыға арнайы сертификат табысталды.
ШАҒЫН ЖӘНЕ ОРТА БИЗНЕСТІ ДАМЫТУҒА ЖОЛ АШАДЫ
«Кәсіпкерлік негіздері және агроқұзыреттілік» тақырыбындағы семинарлар тұрғындардың бизнес саласындағы білімін арттыруға және жаңа бастамаларды жүзеге асыруына бағытталған. Әсіресе ауылдық жерлерде кәсіпкерлік мүмкіндіктерді тиімді пайдалану мен ауыл шаруашылығы бағытындағы жобаларды дамытуға қажетті білімнің маңызы зор.
Осындай оқыту шаралары тұрғындардың кәсіпкерлік әлеуетін арттырып, мемлекеттік қолдау тетіктері туралы хабардарлығын кеңейтеді. Сонымен қатар өңірдегі шағын және орта бизнестің дамуына ықпал етіп, жаңа кәсіп бастауға ынталы азаматтарға бағыт-бағдар береді.
