Мақтаарал ауданында тұрғындардың өтініштерін қарау сапасы, пайдаланылмай жатқан жер телімдерін тиімді игеру, көшелерді құжаттандыру және елді мекендерді абаттандыру мәселелері тұрақты бақылауда. Осы бағыттардағы жұмыстар аудан әкімдігінде өткен кезекті аппараттық мәжілісте жан-жақты талқыланды.
Жиынға аудан әкімі Бақыт Асанов төрағалық етіп, оған әкім орынбасарлары, аппарат басшысы, аумақтық мекемелердің жетекшілері, дербес бөлімдердің басшылары, кенттер мен ауылдық округ әкімдері қатысты. Мәжілісте күн тәртібіне шығарылған мәселелер бойынша жауапты мамандардың есептері тыңдалып, алдағы уақытта атқарылуы тиіс міндеттер айқындалды.
ТҰРҒЫНДАРДЫҢ ӨТІНІШТЕРІНЕ ЖАУАПКЕРШІЛІКПЕН ҚАРАУ МАҢЫЗДЫ
Аппараттық мәжілістің алғашқы мәселесі тұрғындардан келіп түскен арыз-шағымдар мен жоғары тұрған органдардан жолданған қызметтік хаттардың орындалу барысына арналды. Бұл бағыт бойынша аудан әкімі аппаратының жалпы, әкімшілік және мемлекеттік құпияларды қорғау бөлімінің бас инспекторы Нұрбол Боранбаев баяндама жасады.
Оның мәліметінше, жыл басынан бері Мақтаарал ауданында 2269 өтініш тіркелген. Бұл өткен жылдың сәйкес кезеңімен салыстырғанда 385 өтінішке аз. Аталған көрсеткіш тұрғындармен кері байланысты қамтамасыз ету және олардың мәселелерін шешу бағытында жүргізіліп жатқан жұмыстардың маңызды нәтижелерінің бірі саналады.
Сонымен қатар өтініштерді қарау барысында жауапты мамандар тарапынан заң талаптарының бұзылуына қатысты бірқатар факті анықталған. Осыған байланысты аудан әкімі Бақыт Асанов мәселенің маңыздылығына ерекше тоқталып, заң бұзушылыққа жол берген мекеме басшыларынан ауызша түсініктеме алды. Сондай-ақ тұрғындардың өтініштерін қарау кезінде заң талаптарын қатаң сақтау, белгіленген мерзімдерді бұзбау және әрбір өтініш бойынша тиісті шешім қабылдау қажеттігін ескертті.
Аудан басшысы жауапты тұлғаларға мұндай жағдайлардың қайталануына жол бермеуді тапсырды. Бұл ретте мемлекеттік органдар жұмысының тиімділігі тұрғындар өтініштерінің уақытылы әрі сапалы қаралуымен тікелей байланысты екені назарға алынды.
ПАЙДАЛАНЫЛМАЙ ЖАТҚАН ЖЕР ТЕЛІМДЕРІ ИГЕРІЛУІ ТИІС
Күн тәртібіндегі екінші мәселе аудан аумағындағы пайдаланылмай жатқан коммерциялық, өндірістік, ауыл шаруашылығы, жайылымдық және өзге де мақсаттағы жер телімдерінің жай-күйіне арналды. Жер ресурстарын тиімді пайдалану, игерілмей жатқан аумақтарды анықтау және оларды белгіленген мақсатта қолдануға бағытталған жұмыстар туралы ауданның жер қатынастары бөлімінің басшысы Өсер Мырзамдамов пен сәулет, қала құрылысы және құрылыс бөлімінің басшысы Ербол Тұрғанбаев баяндады.
Жүргізілген түгендеу нәтижесінде жалпы аумағы 130 гектарды құрайтын 40 игерілмеген жер телімі анықталған. Жер иелерімен түсіндіру жұмыстары жүргізілгеннен кейін олардың 13-і өздеріне тиесілі аумақтарды игеруге кіріскен. Бұл телімдердің жалпы көлемі 40 гектарды құрайды.
Ал 59 гектар жер телімін иесінің қайтыс болуына байланысты иесіз мүлік ретінде рәсімдеу жұмыстары қолға алынған. Бұдан бөлек, нақты игерілмей жатқан 30 гектар аумаққа қатысты тиісті шаралар қабылдау үшін облыстық жер ресурстары басқармасына хат жолданған.
Жер телімдерін түгендеу мен олардың нақты пайдаланылуын бақылау ауданның жер қорын тиімді басқаруға мүмкіндік береді. Сондықтан бұл бағыттағы жұмыстарды жүйелі түрде жалғастыру, жер иелерімен түсіндіру жұмыстарын жүргізу және заң талаптарына сәйкес тиісті шаралар қабылдау қажеттігі атап өтілді.
КӨШЕЛЕРДІ ҚҰЖАТТАНДЫРУ ЖӘНЕ ТҰРҒЫН ҮЙ КЕЗЕГІН ТҮГЕНДЕУ ЖҰМЫСТАРЫ ЖАЛҒАСУДА
Мәжілісте тұрғын үй-коммуналдық шаруашылық, жолаушылар көлігі, автомобиль жолдары және тұрғын үй инспекциясы бөлімінің басшысы Ғабит Полатов та баяндама жасады. Ол мемлекеттік акт рәсімдеуді қажет ететін ішкі көшелердің құжаттарын дайындау, тұрғын үй кезегінде тұрған азаматтардың деректерін түгендеу және «Таза Қазақстан» республикалық экологиялық акциясы аясында атқарылып жатқан жұмыстар жөнінде мәлімет берді.
Қазіргі уақытта ауданда мемлекеттік акт алуы қажет 323 көшенің 191-іне тиісті құжаттар рәсімделген. Қалған көшелер бойынша құжаттандыру жұмыстарын аяқтау міндеті тұр. Осыған орай аудан әкімі жауапты бөлімге жұмысты жеделдетіп, құжаттары әлі рәсімделмеген көшелер бойынша шараларды күшейтуді тапсырды.
Тұрғын үй кезегіне қатысты мәліметтер де назардан тыс қалған жоқ. Бүгінде ауданда тұрғын үй кезегінде 2453 азамат тіркелген. Олардың 2185-інің деректері түгендеуден өткен. Қалған 268 азаматтың мәліметтерін тексеріп, тиісті жұмыстарды толық аяқтау қажеттігі айтылды.
Тұрғын үй кезегіндегі азаматтар туралы мәліметтердің өзектілігін қамтамасыз ету тұрғын үй мәселелерін шешу кезінде маңызды рөл атқарады. Осыған байланысты түгендеу жұмыстарын сапалы жүргізу, деректердің дұрыстығын тексеру және белгіленген міндеттерді мерзімінде орындау тапсырылды.
«ТАЗА ҚАЗАҚСТАН»: ТАЗАЛЫҚ ПЕН ТӘРТІП БАСТЫ НАЗАРДА
Аппараттық мәжілісте «Таза Қазақстан» республикалық экологиялық акциясы аясында атқарылып жатқан жұмыстар да талқыланды. Аудан аумағындағы елді мекендердің тазалығын сақтау, қоғамдық орындарда тәртіпті қамтамасыз ету және экологиялық талаптардың орындалуын бақылау бағытындағы шаралар қаралды.
Жыл басынан бері тазалық пен тәртіп талаптарын бұзған 59 азаматқа ескерту беріліп, 6 азаматқа әкімшілік айыппұл салынған. Құқық бұзушылықтардың алдын алу және бақылау жұмыстарын күшейту мақсатында кенттер мен ауылдық округ әкімдіктеріне арнайы планшеттер берілген.
Бұл құралдар анықталған құқық бұзушылықтарды тіркеуге және тиісті бақылау шараларын жүргізуге мүмкіндік береді. Сонымен қатар елді мекендердің тазалығын сақтау тек арнайы акциялар кезінде ғана емес, күнделікті атқарылатын жұмыстардың маңызды бөлігі болуы қажет. Осы тұрғыда жергілікті атқарушы органдардың жауапкершілігін арттыруға және тазалық талаптарының сақталуын жүйелі бақылауға басымдық беріліп отыр.
НАҚТЫ ТАПСЫРМА, САПАЛЫ ОРЫНДАЛУ
Аппараттық мәжілісті қорытындылаған аудан әкімі Бақыт Асанов күн тәртібінде қаралған әрбір мәселе бойынша жауапты бөлімдер мен ауылдық округ әкімдеріне нақты міндеттер жүктеді.
Атап айтқанда, тұрғындардың өтініштерін заң талаптарына сәйкес қарау, пайдаланылмай жатқан жер телімдерін игеру жұмыстарын бақылау, көшелерді құжаттандыруды жеделдету, тұрғын үй кезегіндегі азаматтардың деректерін толық түгендеу және экологиялық акция аясындағы тазалық шараларын күшейту тапсырылды.
Аудан басшысы белгіленген міндеттердің уақытылы әрі сапалы орындалуын қамтамасыз етуді міндеттеп, жауапты тұлғалардың жұмысына тиісті бақылау жүргізу қажеттігін атап өтті.
Мақтаарал ауданында көтерілген мәселелердің жүйелі шешілуі мемлекеттік қызмет сапасын арттыруға, жер ресурстарын тиімді пайдалануға және елді мекендердің тазалығы мен көркін жақсартуға бағытталған жұмыстардың нәтижелі жүзеге асуына ықпал етеді.
Мақтаарал ауданы әкімінің баспасөз қызметі
