Мемлекеттік қызметшілер күні қарсаңында Кентау қаласының әкімі Жандос Тасов мемлекеттік қызметшілерді кәсіби мерекесімен құттықтап, олардың ел игілігі мен қала дамуына қосып отырған үлестерін атап өтті.
Кездесу барысында қала басшысы мемлекеттік қызметтің қоғам алдындағы жауапкершілігі жоғары сала екенін айтып, мемлекеттік қызметшілерден кәсібилікпен қатар, өз ісіне адалдық, жауапкершілік және халықпен тиімді жұмыс істей білу талап етілетінін жеткізді.
Қала әкімінің айтуынша, Кентаудың әлеуметтік-экономикалық дамуы, инфрақұрылымның жаңаруы және тұрғындардың тұрмыс сапасын арттыруға бағытталған жұмыстардың жүзеге асуында мемлекеттік қызметшілердің еңбегі маңызды орын алады.
«Бүгінде қаламыздың әлеуметтік-экономикалық дамуы, инфрақұрылымның жаңаруы, тұрғындардың тұрмыс-тіршілігін жақсартуға бағытталған жұмыстардың жүзеге асуы – мемлекеттік қызметшілердің қажырлы еңбегінің нәтижесі. Осы мерекелі күні баршаңызға ел игілігі жолындағы адал қызметтеріңіз үшін алғысымды білдіремін. Сіздерге мықты денсаулық, отбасыларыңызға амандық, еңбектеріңізге толағай табыс, жауапты қызметтеріңізде жаңа жетістіктер тілеймін», деді қала әкімі.
Мемлекеттік қызметшілердің күнделікті атқаратын жұмысы қаланың әлеуметтік және экономикалық мәселелерін шешуге, мемлекеттік бағдарламаларды іске асыруға, инфрақұрылымдық жобаларды жүзеге асыруға және тұрғындардың өтініштері мен ұсыныстарын қарауға бағытталған.
Кентау қаласында тұрғындардың әл-ауқатын арттыру, қаланың инфрақұрылымын дамыту және халыққа көрсетілетін мемлекеттік қызметтердің сапасын жақсарту бағытындағы жұмыстар жүйелі түрде жүзеге асырылуда. Бұл ретте мемлекеттік қызметшілердің кәсіби біліктілігі мен жауапкершілігі маңызды рөл атқарады.
Мерекелік шара барысында қаладағы түрлі салаларда қызмет атқарып жүрген бірқатар мемлекеттік қызметшілер Кентау қаласы әкімінің Алғыс хатымен марапатталды. Марапаттар қызметтік міндеттерін сапалы орындап, мемлекеттік қызметті дамытуға және қала тұрғындарына қызмет көрсетуге үлес қосқан қызметкерлерге табысталды.
Жиында мемлекеттік қызметшілердің еңбегін бағалау, олардың кәсіби дамуына жағдай жасау және халықпен өзара байланысты нығайту мәселелерінің маңыздылығы да атап өтілді.
Мемлекеттік қызметшілер күні – ел дамуына қызмет етіп жүрген азаматтардың еңбегін бағалайтын маңызды кәсіби мерекелердің бірі. Бұл күн мемлекеттік қызмет саласында еңбек етіп жүрген мамандарға құрмет білдіріп, олардың қоғам алдындағы жауапкершілігін тағы бір мәрте айқындайды.
