ҚҰҚЫҚ БҰЗУШЫЛЫҚТЫҢ АЛДЫН АЛУ ЖӘНЕ ҚОҒАМДЫҚ ҚАУІПСІЗДІКТІ ҚАМТАМАСЫЗ ЕТУ МӘСЕЛЕЛЕРІ ҚАРАЛДЫ: ТӨЛЕБИ АУДАНЫНДА ВЕДОМСТВОАРАЛЫҚ КОМИССИЯНЫҢ КЕЗЕКТІ ОТЫРЫСЫ ӨТТІ

Төлеби ауданында азаматтардың қауіпсіздігін қамтамасыз ету, түрлі құқық бұзушылықтар мен қылмыстардың алдын алу, сондай-ақ қоғамдық тәртіпті қатаң сақтау бағытындағы кешенді жұмыстар жүйелі түрде жалғасып келеді. Мемлекет тарапынан «Әділетті Қазақстан» құру, заң мен тәртіп үстемдігін қамтамасыз ету және азаматтардың қауіпсіз өмір сүру ортасын қалыптастыру бағытындағы маңызды бастамаларды өңірде тиянақты жүзеге асыру мақсатында Төлеби ауданы әкімдігі жанындағы құқық бұзушылық профилактикасы жөніндегі ведомствоаралық комиссияның кезекті отырысы ұйымдастырылды. Комиссия отырысында аудан аумағында құқық бұзушылықтың ерте алдын алу, қоғамдық қауіпсіздікті тиісті деңгейде қамтамасыз ету және профилактикалық іс-шараларды одан әрі күшейту бағытындағы өзекті мәселелер жан-жақты қаралды. Маңызды жиынға аудан әкімінің міндетін уақытша атқарушы Бағдатбек Жанғазиев төрағалық етіп, күн тәртібіндегі түйінді тұстарды саралады. Жиында қарастырылған күн тәртібіндегі бірінші мәселе қазіргі таңда қоғамда өзекті болып отырған киберқылмысқа қарсы іс-қимылдың маңызды тұстарына, соның ішінде өршіп бара жатқан интернет алаяқтық әрекеттерінің қатаң алдын алуға арналды. Аталған бағыт бойынша атқарылып жатқан жұмыстар пен орын алып отырған жағдайлар туралы Төлеби аудандық полиция бөлімінің бастығы, полиция подполковнигі Н. Әжібеков арнайы баяндама жасап, тұрғындар арасында ақпараттық-түсіндіру жұмыстарын күшейту қажеттігін атап өтті. Бұдан бөлек, комиссия отырысында контрабандаға қарсы күрес жүргізу және оның алдын алу шаралары, сондай-ақ қаржылық және экономикалық сипаттағы қылмыстардың профилактикасы мәселелері жіті қарастырылды. Бұл бағыттағы атқарылып жатқан шаралар бойынша Төлеби аудандық полиция бөлімі басшысының орынбасары, полиция майоры А. Аширбаев жан-жақты ақпарат беріп, саладағы жағдайға тоқталды. Күн тәртібіндегі үшінші маңызды мәселе жол-көлік оқиғаларының санын азайту, олардың алдын алу және жол инфрақұрылымын заманауи талаптарға сай дамыту саласында атқарылған жұмыстардың нақты нәтижелеріне арналды. Осы сала бойынша А. Аширбаев және Төлеби ауданының тұрғын үй-коммуналдық шаруашылық, жолаушылар көлігі және автомобиль жолдары бөлімі басшысының міндетін атқарушы А. Бекеев баяндама жасап, атқарылған іс-шаралар мен алдағы жоспарларды ортаға салды. Алқалы отырыс барысында құқық бұзушылықтардың дер кезінде алдын алу, халық арасында интернет алаяқтыққа қарсы түсіндіру жұмыстарын барынша күшейту, өңірдегі қоғамдық қауіпсіздікті сенімді қамтамасыз ету және жол-көлік оқиғаларының орын алу қаупін болдырмау бағытындағы жұмыстарды әрқашан жүйелі түрде жүргізу қажеттігіне баса назар аударылды.