Сауран ауданында Ұстаздар күніне орай «Ұстазға құрмет – ұрпаққа өнеге» тақырыбында салтанатты іс-шара ұйымдастырылды. Мерекелік жиынға аудан әкімдігінің өкілдері, білім саласының ардагерлері, білім беру ұйымдарының басшылары, педагогтер, қоғамдық ұйым өкілдері мен сала қызметкерлері қатысты.
ҰСТАЗ ЕҢБЕГІНЕ ҚҰРМЕТ КӨРСЕТІЛДІ
Іс-шарада аудан әкімі Мақсат Таңғатаров ұстаздар қауымын кәсіби мерекемен құттықтап, олардың қоғамдағы маңызды рөліне тоқталды. Ол білім беру сапасын арттыру, өскелең ұрпаққа сапалы білім мен саналы тәрбие беру жолында педагогтерге үлкен жауапкершілік жүктелетінін атап өтті.
Сондай-ақ аудан басшысы шәкірттерге білім мен тәрбие беріп, олардың болашағына бағыт-бағдар көрсетіп жүрген мұғалімдердің еңбегіне алғысын білдірді.
ҮЗДІК ПЕДАГОГТЕР МАРАПАТТАЛДЫ
Салтанатты жиында білім беру саласында нәтижелі еңбек етіп жүрген бірқатар қызметкер марапатқа ие болды. Педагогтерге Ыбырай Алтынсарин атындағы төсбелгі, Қазақстан Республикасы Оқу-ағарту министрлігінің және Түркістан облысы әкімінің Алғыс хаттары табысталды. Сонымен қатар білім саласының бірқатар маманы аудандық деңгейдегі марапаттар мен аудан әкімінің Алғыс хаттарына ие болды.
Марапаттау рәсімінде Түркістан облысының білім басқармасы, Сауран ауданының білім бөлімі және білім және ғылым қызметкерлерінің кәсіподақ ұйымы тарапынан да сала мамандарының еңбегі еленді.
Бұл марапаттар ұстаздардың кәсіби біліктілігі мен білім беру ісіне қосқан үлесіне көрсетілген құрметтің белгісі болды.
МЕРЕКЕЛІК КЕШ ӘН-ШАШУМЕН ЖАЛҒАСТЫ
Салтанатты шара концерттік бағдарламамен жалғасты. Мектеп оқушылары мен өнерпаздар ұстаздарға арналған әндер орындап, мерекелік көңіл күй сыйлады.
Ұстаздар күніне арналған бұл басқосу білім саласы қызметкерлерінің еңбегін дәріптеп, ұстаз мәртебесін көтеруге бағытталды. Ұрпақ тәрбиесіне үлес қосып жүрген педагогтерге құрмет көрсету дәстүрі жалғасын таба бермек.
Сауран ауданы әкімдігінің баспасөз қызметі
