Сауран ауданы әкімдігінде аудан әкімі Мақсат Таңғатаровтың төрағалығымен кезекті апталық жиын өтті. Басқосуда халықты әлеуметтік қолдау, 2026–2027 жылдардағы жылыту маусымына дайындық және аудан аумағында жүзеге асырылып жатқан өндірістік жобалардың барысы қаралды. Күн тәртібіндегі мәселелер бойынша жауапты бөлім басшылары есеп беріп, атқарылып жатқан жұмыстардың жай-күйін баяндады.
ӘЛЕУМЕТТІК ҚОЛДАУ ШАРАЛАРЫ КҮШЕЙТІЛЕДІ
Жиында Отбасының цифрлық картасы ақпараттық жүйесіндегі D және E санатындағы отбасылардың санын азайту бағытында атқарылған жұмыстар талқыланды.
Жұмыспен қамту және әлеуметтік бағдарламалар бөлімінің басшысы Асылбек Дауырхан әлеуметтік осал санаттағы отбасыларға көмек көрсету, азаматтарды тұрақты жұмыспен қамту және олардың табысын арттыру бойынша жүргізіліп жатқан жұмыстарға тоқталды.
Бұл бағыттағы шаралардың негізгі мақсаты – мұқтаж отбасылардың әлеуметтік жағдайын жақсарту, еңбекке қабілетті азаматтардың жұмысқа орналасуына ықпал ету және мемлекеттік қолдаудың тиімділігін арттыру.
ЖЫЛУ МАУСЫМЫНА ДАЙЫНДЫҚ ПЫСЫҚТАЛДЫ
Күн тәртібіндегі екінші мәселе 2026–2027 жылдардағы жылыту маусымына дайындыққа арналды. Тұрғын үй-коммуналдық шаруашылығы және тұрғын үй инспекциясы бөлімі басшысының міндетін атқарушы Сейденбек Ақселеу аудан аумағындағы әлеуметтік нысандардың, жылу жүйелері мен қазандықтардың дайындығы туралы ақпарат берді.
Жылыту маусымының тұрақты өтуі үшін тиісті инфрақұрылымның әзірлігі мен жылу жүйелерінің үздіксіз жұмысын қамтамасыз ету маңызды. Осыған байланысты жауапты бөлімдердің жұмысы назарға алынып, дайындық шараларын белгіленген мерзімде аяқтау мәселесі қаралды.
ӨНДІРІСТІК ЖОБАЛАРДЫҢ ЖҮЗЕГЕ АСУЫ ҚАРАЛДЫ
Жиында ауданда салынып жатқан өндірістік нысандар мен мал бордақылау алаңдарының құрылыс барысы да талқыланды. Атап айтқанда, жобалардың іске қосылу мерзімдері, өндірістік әлеуеті және жаңа жұмыс орындарын ашу мүмкіндіктері жөнінде мәлімет берілді.
Мұндай жобаларды уақытылы жүзеге асыру аудан экономикасының дамуына, жергілікті тұрғындарды жұмыспен қамтуға және кәсіпкерлік әлеуетті арттыруға мүмкіндік береді.
ЖАУАПТЫ БӨЛІМДЕРГЕ НАҚТЫ ТАПСЫРМАЛАР БЕРІЛДІ
Жиынды қорытындылаған аудан әкімі Мақсат Таңғатаров жауапты бөлімдерге бірқатар нақты тапсырма жүктеді. Әлеуметтік қолдау шараларының тиімділігін арттыру, жылыту маусымына дайындықты толық аяқтау және өндірістік жобалардың белгіленген мерзімде іске асырылуын қамтамасыз ету міндеттері қойылды.
Аудан басшысы күн тәртібіндегі мәселелердің орындалуын жүйелі бақылауда ұстаудың маңыздылығын атап өтті.
Сауран ауданы әкімдігінің баспасөз қызметі
