Ордабасы ауданында мерзімді әскери қызметке шақыру науқанының ұйымдастырылу барысы, осы бағытта атқарылған жұмыстар мен алдағы міндеттер талқыланды. Жиынды аудан әкімінің аппарат басшысы Жуманалы Кадиев жүргізіп, жауапты мамандармен шақыру науқанын үйлестіру мәселелерін қарастырды.
ЖАУАПТЫ МАМАНДАРДЫҢ БАЯНДАМАЛАРЫ ТЫҢДАЛДЫ
Жиынға аудан әкімінің кеңесшісі Әсел Баймаханова, ауылдық округтердің жауапты мамандары мен тиісті сала өкілдері қатысты.
Күн тәртібіндегі мәселе бойынша аудандық қорғаныс істері жөніндегі бөлімнің бастығы Бақдәулет Ташпулатов баяндама жасап, мерзімді әскери қызметке шақыру науқанының қазіргі жағдайы мен алдағы кезеңде атқарылатын жұмыстар туралы ақпарат берді.
ШАҚЫРУ ЖҰМЫСТАРЫН ҮЙЛЕСТІРУ МАҢЫЗДЫ
Талқылау барысында ауылдық округтер бойынша әскерге шақырылуға жататын азаматтардың саны, оларды медициналық тексеруден өткізу барысы және шақыру жұмыстарын тиімді ұйымдастыру мәселелері қаралды.
Сонымен қатар жауапты мекемелер арасындағы өзара байланысты күшейту, әрбір азаматқа қатысты мәліметтердің нақтылығын қамтамасыз ету және ұйымдастыру жұмыстарын жүйелі жүргізу қажеттігі атап өтілді. Бұл бағыттағы жұмыстарды үйлесімді атқару шақыру науқанының белгіленген талаптарға сай өтуіне мүмкіндік береді.
АЛДАҒЫ МІНДЕТТЕР АЙҚЫНДАЛДЫ
Жиын қорытындысы бойынша жауапты мамандарға мерзімді әскери қызметке шақыру науқанын белгіленген талаптарға сәйкес ұйымдастыру, медициналық тексеру жұмыстарын үйлестіру және жүктелген міндеттердің уақытылы орындалуын қамтамасыз ету тапсырылды.
Ауданда әскери қызметке шақыру науқанын тиісті деңгейде өткізу үшін жауапты мекемелердің өзара іс-қимылын үйлестіруге және ұйымдастыру жұмыстарының сапасына басымдық берілмек.
Ордабасы ауданы әкімінің баспасөз қызметі
