Ордабасы ауданында 18 қазан – «Рухани келісім» күніне орай «Дінтану және зайырлылық» тақырыбында семинар ұйымдастырылды. Іс-шараның негізгі мақсаты – мемлекеттік дін саясатының бағыттарын түсіндіру, зайырлылық қағидаттарын насихаттау, діни сауаттылықты арттыру және қоғамдағы рухани келісім мен тұрақтылықты нығайту.
Семинар барысында дін мен дәстүрдің сабақтастығы, отбасы тәрбиесінің маңызы, ұлттық құндылықтарды сақтау және діни экстремизмнің алдын алу мәселелері кеңінен қозғалды.
ЗАЙЫРЛЫЛЫҚ ҚАҒИДАТТАРЫ МЕН ЗАҢ ТАЛАПТАРЫ ТҮСІНДІРІЛДІ
Жиында Түркістан облысының Дін істері басқармасына қарасты «Дін мәселелерін зерттеу орталығы» КММ бөлім басшысы Салықбаев Қайрат Құралтайұлы «Заң және тәртіп» қағидаты аясында дін саласындағы тұрақтылықты қамтамасыз ету тақырыбында баяндама жасады.
Баяндамашы дін саласындағы тұрақтылықты сақтау, заң талаптарын түсіндіру және қоғамда құқықтық мәдениетті қалыптастыру мәселелеріне тоқталды. Сондай-ақ діни сауаттылықты арттыру мен алдын алу бағытындағы түсіндіру жұмыстарының маңыздылығы атап өтілді.
ОТБАСЫ ТӘРБИЕСІ МЕН ҰЛТТЫҚ ҚҰНДЫЛЫҚТАР – РУХАНИ ТҰРАҚТЫЛЫҚ НЕГІЗІ
Ордабасы аудандық «Әкелер мектебінің» төрағасы Жүсіп Лесбек Мұңсызбайұлы «Отбасы тәрбиесі және ұлттық құндылықтар – рухани тұрақтылықтың негізі» тақырыбында сөз сөйледі. Ол бала тәрбиесіндегі отбасының рөліне тоқталып, жас ұрпақтың бойына адамгершілік қасиеттерді, үлкенге құрмет пен кішіге ізет көрсетуді сіңірудің маңызын атап өтті.
Сонымен қатар республикалық ақпараттық-насихат тобының мүшесі Оспанов Арыстан Оразалыұлы «Дін мен дәстүр сабақтастығы – ұлттық құндылықтарды нығайтудың негізі» тақырыбында баяндама жасады. Ол ұлттық дәстүрлерді сақтау, рухани мұраны дәріптеу және оны жас ұрпақтың санасына сіңіру мәселелерін қозғады.
БЕЛСЕНДІЛІК ТАНЫТҚАН АЗАМАТТАР МАРАПАТТАЛДЫ
Іс-шара барысында мемлекеттік дін саясатын іске асыруға, қоғамдағы тұрақтылықты нығайтуға және діни экстремизмнің алдын алу бағытында түсіндіру жұмыстарын жүргізуге үлес қосқан мешіт имамдары мен мемлекеттік қызметкерлер марапатталды.
Оларға Ордабасы ауданы әкімінің Алғыс хаттары мен бағалы сыйлықтары табысталды. Марапаттарды аудандық ішкі саясат бөлімінің басшысы Ысқақ Әділ Пернебайұлы тапсырды.
РУХАНИ КЕЛІСІМ – ЕЛ БІРЛІГІНІҢ НЕГІЗІ
Семинар қорытындысында қоғамдағы өзара құрмет пен келісімді сақтау, ұлттық құндылықтарды дәріптеу және жас ұрпаққа өнегелі тәрбие беру ел бірлігін нығайтудың маңызды бағыттары екені атап өтілді.
Рухани келісім – бейбітшілік пен татулықтың, бірлік пен берекенің негізі. Қоғамда өзара түсіністік пен сыйластықты қалыптастыру, діни сауаттылықты арттыру және ортақ құндылықтарды дәріптеу – тұрақты әрі үйлесімді қоғам құру жолындағы баршаға ортақ міндет.
