Республика күні қарсаңында Арыс қаласында Әл-Фараби атындағы жекеменшік бастауыш мектептің салтанатты ашылу рәсімі өтті. Жаңа білім ордасы балалардың сапалы білім алуына жағдай жасап, қаладағы білім беру инфрақұрылымын дамытуға үлес қоспақ.
ЖАҢА БІЛІМ ОРДАСЫНЫҢ АШЫЛУ САЛТАНАТЫ
Салтанатты жиынға қала әкімі Қайсар Маңқараев, ардагерлер, зиялы қауым өкілдері, білім саласының ардагерлері, ұстаздар мен оқушылар қатысты. Шара барысында мектептің көгілдір лентасы қиылып, жаңа білім ордасының есігі ресми түрде ашылды.
120 ОҚУШЫҒА АРНАЛҒАН МЕКТЕП
Жеке кәсіпкердің өз қаражаты есебінен ашылған мектеп 120 оқушыға арналған. Мұнда білікті ұстаздар сабақ беріп, балалардың білім алуына қажетті жағдайлар қарастырылған. Сонымен қатар оқушылардың мектепке қатынауын жеңілдету мақсатында тасымал қызметі де ұйымдастырылған.
БІЛІМ БЕРУ ИНФРАҚҰРЫЛЫМЫН ДАМЫТУҒА ҚОСЫЛҒАН ҮЛЕС
Жаңа мектептің ашылуы қаладағы оқушы орындарының тапшылығын азайтуға және үш ауысымды оқытудың алдын алуға ықпал етеді. Жекеменшік білім беру ұйымдарының ашылуы ата-аналарға қосымша мүмкіндік ұсынып, балаларға қолайлы оқу ортасын қалыптастыруға бағытталған.
Әл-Фараби атындағы бастауыш мектептің іске қосылуы Арыс қаласындағы білім беру саласының дамуына қосылған маңызды үлес болды. Жаңа білім ордасы шәкірттердің сапалы білім алып, жан-жақты дамуына қызмет етеді деген сенім бар.
Арыс қаласы әкімінің баспасөз қызметі
