Ұлт тарихының тереңіне бойлатып, сақ өркениетінің бай мұрасын танытатын көшпелі көрме Ордабасы ауданында ашылды. «Ордабасы» ұлттық тарихи-мәдени қорық-музейінде «Есік» мемлекеттік тарихи-мәдени музей-қорығының ұйымдастыруымен «Алтын адамның табылу және зерттелу тарихы» атты көшпелі көрменің салтанатты ашылу рәсімі өтті.
Тарихи-танымдық жобаның мақсаты – ежелгі дәуір мұраларын кеңінен насихаттау, археологиялық жаңалықтардың маңызын түсіндіру және ұлттық тарихқа деген қызығушылықты арттыру.
АЛТЫН АДАМ – ҰЛТТЫҚ МҰРАНЫҢ БАҒА ЖЕТПЕС ҚҰНДЫЛЫҒЫ
Алтын адам – қазақ даласындағы ежелгі өркениеттің жоғары деңгейін, ата-бабаларымыздың зергерлік өнері мен мәдениетінің дамығанын айғақтайтын бірегей тарихи мұра. Оның табылуы мен зерттелуі Қазақстанның көне тарихын тереңірек тануға мүмкіндік беріп, сақ дәуірінің мәдениеті мен дүниетанымын зерделеуге жол ашты.
Алтын адамға қатысты зерттеулерді көпшілікке таныстыру өткенді танып-білумен қатар, ұлттық құндылықтарды кейінгі ұрпақтың бойына сіңіруге ықпал етеді. Осы тұрғыдан алғанда, көшпелі көрменің тарихи әрі тәрбиелік маңызы зор.
МУЗЕЙЛЕР ЫНТЫМАҚТАСТЫҒЫ – ТАРИХИ МҰРАНЫ НАСИХАТТАУДЫҢ ТИІМДІ ЖОЛЫ
Салтанатты шараға мәдениет және музей саласының өкілдері, тарихшылар, ғалымдар, ардагерлер, ұстаздар мен оқушылар қатысты.
Жиында «Ордабасы» ұлттық тарихи-мәдени қорық-музейінің директоры Досалы Жайлауұлы құттықтау сөз сөйлеп, музейлер арасындағы ынтымақтастықтың тарихи мұраны сақтау мен насихаттаудағы маңызын атап өтті.
Сондай-ақ «Есік» мемлекеттік тарихи-мәдени музей-қорығының директоры Әзімхан Серікұлы, Түркістан облыстық мәдениет басқармасы басшысының орынбасары Ғалымжан Бақытжанұлы, Шымкент қалалық музейлер бірлестігінің директоры Жандос Керімұлы және Бадам ауылдық ардагерлер кеңесінің төрағасы Шахар Қаназарұлы сөз сөйлеп, көрменің тарихи-танымдық маңызына тоқталды.
Қатысушылар мұндай мәдени жобалардың ел тарихын тереңірек танып, тарихи жәдігерлерді кеңінен насихаттауға мүмкіндік беретінін атап өтті.
КӨШПЕЛІ КӨРМЕ КӨРЕРМЕНГЕ ЖОЛ ТАРТТЫ
Салтанатты рәсімде көрменің ашылу лентасы қиылып, жиналған қауым экспозициямен танысты. Келушілер назарына сақ дәуірінің құнды жәдігерлері мен археологиялық олжалардың жаңғыртпалары ұсынылды. Сонымен қатар Алтын адамның табылу тарихы, оны зерттеу кезеңдері және тарихи мұраны ғылыми тұрғыдан зерделеудің маңызы таныстырылды.
Экспозиция көрермендерге ежелгі сақ мәдениеті туралы мағлұмат беріп, археологиялық мұралардың ұлттық тарихтағы орнын тереңірек түсінуге мүмкіндік береді. Әсіресе жас ұрпақ үшін мұндай көрмелердің танымдық мәні ерекше.
КӨРМЕ 9 ҚАРАШАҒА ДЕЙІН ЖАЛҒАСАДЫ
«Алтын адамның табылу және зерттелу тарихы» атты көшпелі көрме тарихи мұраны көпшілікке жақындатып, өткен мен бүгіннің арасындағы сабақтастықты нығайтуға бағытталған тағылымды жоба саналады.
Көрме 9 қазан мен 9 қараша аралығында «Ордабасы» ұлттық тарихи-мәдени қорық-музейінің көрме залында жалғасады. Тарихқа қызығатын тұрғындар мен қонақтар осы уақыт аралығында экспозицияны тамашалап, халқымыздың бай мәдени мұрасымен жақынырақ таныса алады.
